Təhsil İdman Peşə İnnovasiya Karyera

Beynəlxalq Ləyihələr

Logo

“4Sİ Akademiyası” çərçivəsində “Milli Proqram”ın 4-cü mərhələsi tamamlanıb

“4Sİ Akademiyası” çərçivəsində “Milli Proqram”ın 4-cü mərhələsi tamamlanıb

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) və Elm və Təhsil Nazirliyinin tabeliyində Təhsilin İnkişafı Fondunun birgə əməkdaşlığı ilə həyata keçirilən “4Sİ Akademiyası” çərçivəsində “Milli Proqram”ın 4-cü mərhələsi tamamlanıb. Bu mərhələdə “Milli Proqram”a qoşulan 7500 nəfər “Coursera” onlayn təhsil platformasında rekord sayda - 18 mindən çox təlimi uğurla bitirib. Vətəndaşlar daha əvvəlki mərhələlərdə maksimum 14 min təlimi uğurla başa vurmuşdular.

Bu ilin aprel ayından başlayan Proqram çərçivəsində bu günədək ümumilikdə 30 min nəfər təhsil platformasında təqdim olunan təlimlərdən ödənişsiz yararlanmaq imkanı qazanıb. Vətəndaşlar 60 mindən çox təlimi uğurla başa vuraraq beynəlxalq səviyyəli sertifikatlar əldə ediblər.

Bu gündən başlayaraq “Milli Proqram”ın 5-ci mərhələsinə start verilib. Beləliklə, növbəti 7500 nəfər 6 həftə ərzində platformada təqdim olunan kurslardan yararlanmaq imkanı əldə edib.

“Milli Proqram” istifadəçiləri daha çox süni intellekt və data elmi sahəsində təlimlərə üstünlük verir. Bununla yanaşı, layihələrin idarə olunması, informasiya texnologiyaları, yumşaq bacarıqlar, kommunikasiya və dil, sosial elmlər, eləcə də biznes sahəsi üzrə təlimlərə də maraq artıb. Proqram çərçivəsində 1 il ərzində on minlərlə istifadəçinin dünyanın ən böyük onlayn tədris platforması olan “Coursera”da təlimlərdən faydalanması nəzərdə tutulub. “Milli Proqram” SOCAR, “Paşa Holdinq”, bp, JOCAP və “Azerconnect Group” kimi aparıcı şirkətlərin tərəfdaşlığı ilə həyata keçirilir.


“4Sİ Akademiyası” çərçivəsində “Milli Proqram”ın 4-cü mərhələsi tamamlanıb
18 Sentyabr 2025